काठमाडौं । संघीय संसद्को बजेट अधिवेशन आजदेखि सुरु भएको छ ।
अधिवेशनअन्तर्गत राष्ट्रियसभाको बैठक आज दिउँसो २ बजे बस्दैछ । बैठकमा सरकारले ल्याएका विभिन्न अध्यादेशहरू पेस गर्ने कार्यसूची तय गरिएको छ ।
प्रधानमन्त्री बालेन्द्र शाह ‘बालेन’ ले राष्ट्रियसभामा सार्वजनिक खरिद (दोस्रो संशोधन) अध्यादेश, २०८३, सार्वजनिक पदाधिकारीको पदमुक्तिसम्बन्धी विशेष व्यवस्था अध्यादेश, २०८३ तथा संवैधानिक परिषद् (पहिलो संशोधन) अध्यादेश, २०८३ पेस गर्नेछन् ।
कानुन, न्याय तथा संसदीय मामिलामन्त्री सोबिता गौतमले पनि केही नेपाल ऐन संशोधनसम्बन्धी अध्यादेश प्रस्तुत गर्नेछिन् भने भूमि व्यवस्था, सहकारी तथा गरिबी निवारणमन्त्री प्रतिभा रावलले सहकारीसम्बन्धी अध्यादेश पेस गर्नेछिन् ।
यसैगरी अर्थमन्त्री डा. स्वर्णिम वाग्लेले ‘सम्पत्ति शुद्धीकरण (मनी लाउन्डरिङ) निवारण (तेस्रो संशोधन) अध्यादेश, २०८३’ पेस गर्नेछन् ।
यस्तै, स्वास्थ्य तथा जनसंख्यामन्त्री निशा मेहताले स्वास्थ्य विज्ञान प्रतिष्ठानसम्बन्धी अध्यादेश तथा शिक्षा, विज्ञान तथा प्रविधिमन्त्री सस्मित पोखरेलले विश्वविद्यालयसम्बन्धी अध्यादेश पेस गर्ने कार्यसूची रहेको छ ।
बैठकको प्रारम्भमा राष्ट्रियसभा अध्यक्ष नारायणप्रसाद दाहालले राष्ट्रपति रामचन्द्र पौडेलबाट प्राप्त अधिवेशन आह्वानसम्बन्धी पत्र पढेर सुनाउने कार्यक्रम रहेको संसद् सचिवालयले जनाएको छ ।
यसै दिन दिउँसो २ बजे प्रतिनिधिसभाको बैठक पनि बस्नेछ । प्रतिनिधिसभाको बैठकमा पनि अध्यादेश पेस गर्नेलगायत सम्भावित कार्यसूची छ ।
त्यसपछि अपराह्न ४ बजे बस्ने संघीय संसद्को संयुक्त बैठक (प्रतिनिधिसभा र राष्ट्रियसभा)मा राष्ट्रपति पौडेलले सरकारको नीति तथा कार्यक्रम प्रस्तुत गर्नेछन्।
यो खबर पढेर तपाईलाई कस्तो महसुस भयो ?
